নববর্ষ ১৪২৫ : বাজার গিয়া পকেট ফাক আর চউক চরক গাছ

আইজ পইলা বৈশাখ,১৪২৫ বাংলা। সারা মুল্লুক জুড়িয়া হক্কল বাঙালি মিলিয়া পইলা বৈশাখ মানাইন আইজকুর দিন। আইজ থাকিয়া ঔ নয়া বছর শুরু ওইলো।

বাঙালিরা হক্কল সময়অই একটু পেটুক, এর লাগিয়া খানি ছাড়া কোনো অনুষ্ঠান করার কথা চিন্তা ও করা যায়না। বাঙালিয়ে হক্কলতা ছাড়ি দিত পারব কিন্তু পেট ভরিয়া খাওয়া-দাওয়া ছাড়ত পারতো নায়। আর মাছ ছাড়া তো কুন মাত ঔ নাই। কোনো বাঙালিয়ে মাছ যদি না খায় তাঔলে হেরে অবাঙালি কইয়া চিড়ানি ওয় ।

তে আজকে মাছোর বাজারো গিয়া বাঙালিরার চৌক চড়ক গাছ। আগুন লাগছে মাছর বাজারো। এক একটা মাছর দাম শুনিয়া হার্ট ফেইল হওয়ার যোগাড়। কিন্তু পয়লা বৈশাখর দিন ঘরো মাছ খাওয়া ওইতনা ইটা তো মানা যায়না! দাম বেশ অইলেও কিনন্ তো লাগবই! ঔ কথা মাথাত রাখিযা হক্কলে ঝাঁপাইয়া পড়লা বাজার করার লাগি।

হক্কল থাকি বেশি ডিমান্ড আছিল চিতল মাছর।৮০০ থাকিয়া ১২০০ টেকা করিয়া বিকসে বাজারে। পাবদা মাছ আছিল ৮০০ থাকিয়া ৯০০ টেকা। ঘুলা ট্যাংড়া ১০০০ টেকা। হরু ট্যাংড়া ৫০০-৬০০ টাকা। বাউস মাছ বিক্রি হইসে ৪০০ থাকি ১০০০ টেকা পর্যন্ত। ফিশারির বাউস আছিল ৪০০-৫০০ টেকা কিন্তু নদীর বড় বাউস ৯০০-১০০০ টেকা পর্যন্ত। কাজলী মাছ ১০০০ টেকা, বুয়াল মাছ ৫০০ থাকি ৭০০ টেকা। বাঙালির জিহ্বাত পানি আনার মাছ ইলিশ বিকছে ৫০০ থাকি ৮০০ টেকায়।

মাছর দাম বাইড়লেও মাংসত্ কিন্তু বেশ বাইড়ছেনা । খাসির মাংস আছিল ৮০০ টেকা কিলো। মুরগি আগর লাখানউ আছিল ১৩০ টেকা, ১৪০ টেকা ফার্মের মুরগি আর আমরার দেশী মুরগি ২৭০ টেকা।

আইজকাইলকার পুয়া পুরিন ইতা কেএফসি, ডোমিনস্ হতা বায় দৌড়িত্রা । তারা হক্কলে মল অ গিয়া পিজ্জা, চিকেন খাওয়ার ধান্দাত থাকইন। হক্কল সময় খানির সুযোগ পাইন না ওতার লাগি আইজ চান্সে ডান্স মারি দিসইন। নববর্ষের দিন মা বাপেও উপায় না পাইয়া তারার পুয়া পুড়িন্তরে কেএফসি, ডোমিনস খাওয়ার লাগি টেকা দিসইন।বড়রাও আইজ রেস্টুরেন্টঅ খাওয়ার প্ল্যান বানাইছইন যার লাগি মাছ মাংসর বাজারঅ থুড়া থুড়া অইলেও অসর অইছে।

The Video is Made by Adrish Purkayastha